Vrasja e deputetit, skema dhe pistat

Detaje të reja mbi ekzekutimin e Fatmir Xhindit. Prokuroria firmos përgjimet e para. Policia ofron 250 mijë euro për informatorin: Si e qëll.Deputeti socialist, Fatmir Xhindi, është qëlluar me nëntë plumba. Tre plumba i ka marrë në shpatullën e majtë, një plumb nga veshi i majtë i ka dalë në ndarjen mes vetullave, tre plumba i kishte në bark dhe dy në gjymtyrët e poshtme dhe të sipërme, me të cilat mendohet se është mbrojtur pas rrëzimit në tokë. Ky ka qenë konkluzioni i ekspertizës mjekoligjore pas këqyrjes së kufomës. Burime nga grupi i ekspertizës thonë se tre nga plumbat, deputeti i ka marrë përballë, teksa ka parë ekzekutorin. "Tre plumba të tjerë mendohet se kanë bërë rikoshet në tokë dhe më pas janë pozicionuar në sipërfaqen e barit, pranë vendit të ngjarjes". Për vendin e ngjarjes policia ka thënë se ishte plotësisht i dëmtuar. Nëntë gëzhojat dhe tre plumbat janë prova e vetme që është gjetur në vendin e ngjarjes. Policia ka konstatuar në afërsi të vendit ku u vra deputeti një sipërfaqe të vogël bari që ishte përthyer, për të cilën dyshohet se ka marrë formë të tillë pas qëndrimit mbi të të një personi. Thuhet se personi ka qëndruar për më shumë se gjysmë ore mbi sipërfaqen e barit duke pritur.

"Trupi i deputetit ishte pothuaj i mbledhur në barelën që e transportoi nga makina drejt sallës së operacionit. Dukej qartë që kishte marrë shumë plumba. Ishte i mbuluar nga gjaku". Kështu thanë për "Shqip" mjekët e urgjencës së Fierit që ishin në shërbim natën e kaluar. Dy orë pas vdekjes, trupi i tij është transportuar për në morgun e qytetit. Aty, ai u është nënshtruar ekspertizave mjekoligjore.

Sipas dëshmive të mbledhura ditën e shtunë, 49-vjeçari Xhindi ka qenë në disa rrethina të Roskovecit si dhe në qytetin e Fierit. Në këtë të fundit, rreth orës 14:00, ai është takuar me Ervin Koçin, një anëtar i PS-së lokale. Koçi ka thënë për gazetën "Shqip" se "në Fier piva kafe jo shumë të gjatë me të. Si përherë, shkëmbyem batutat e zakonshme me Fatmirin. Ishte shumë i qetë dhe nuk më dha të kuptoja se diçka e shqetësonte". Pas ndarjes me Ervin Koçin, deputeti është takuar po në Fier, për pak minuta me një të njohurin e tij dhe më pas ka udhëtuar për në drejtim të qytezës së Roskovecit. Mësohet se ai është ndalur për një kafe në fshatin Verbas dhe më pas, së bashku me të vëllain, ka shkuar drejt ullishtave që kishin në Kurjan. Në këtë fshat, Xhindi që shoqërohej nga njëri prej vëllezërve, ka qëndruar rreth dy orë, për t‘u kthyer më pas në Roskovec, ku e priste familja. Në rrugën afër shtëpisë, në një lokal të lagjes, ai ka pirë kafe me të vëllain, të cilit i ka thënë se "dua të pi kafe me tre miq të mitë. Ik më përpara në shtëpi dhe më pas flasim". Këtu duket se nis skenari i errët i ekzekutimit mafioz të Fatmir Xhindit. Në pritje të tre personave me të cilët ai ka konsumuar kafen e fundit, mësohet se ai ka takuar një banor të zonës, të cilit i ka kërkuar një korrëse bari. Xhindi i ka hipur sërish makinës për të bërë vetëm pak metra rrugë dhe ka hyrë në portën e shtëpisë, ka zbritur prej makinës dhe teksa tentonte të mbyllte portën është përballur me ekzekutorët, të cilët e kanë thërritur në emër dhe më pas e kanë qëlluar. Fatmir Xhindi e kalonte pjesën më të madhe të kohës në Roskovec, që është zona e tij elektorale. Ai kishte hyrë aq shumë në jetën e zonës që përfaqësonte, sa merrte pjesë në çdo gëzim dhe hidhërim të banorëve. Mësohet se deputeti kishte qenë në Tiranë një ditë përpara vrasjes.

Rrëfimet

Të afërmit tregojnë detaje të natës së vrasjes: Dëgjuam krismat, por nuk pamë njeri


Familjarët: Kemi dyshimet

tona për autorët e vrasjes

Zhurma e një arme automatike kallashnikovi ka thyer qetësinë e qytezës së vogël të Roskovecit, mbrëmjen e së shtunës. Breshëria e gjatë e një karikatori të plotë ka bërë që pjesëtarë të fisit Xhindi, të cilët prej vitesh banojnë pak metra larg Unazës së qytetit të Roskovecit, të dalin të alarmuar nga shtëpitë e tyre dhe të përballen me skenën tragjike. Trupi i vëllait të tyre, deputetit të PS-së, Fatmir Xhindi, i përgjakur, dergjej në portën e shtëpisë.

"Ishte ora 21:15. Televizori po jepte sport. Dëgjuam krismat, që ishin fare pranë. Dolëm menjëherë. Në portën e shtëpisë, që ishte gjysmë e hapur, shumë pranë makinës së tipit "Kia" me targa TR8100K, qëndronte i shtrirë dhe i përgjakur Miri, ashtu siç e thërrisnim. Nuk mbaj mend se çfarë bëra. Di që vetëm ulërita dhe iu afrova Mirit". Këto janë fjalët që vëllai i deputetit, Fadili, ka thënë për vizitorët e shumtë që vinin të ngushëllonin familjen e tij në këtë ditë zie për ta.

Ai thotë se nuk pa njeri kur doli te dera. Por familja e deputetit të vrarë ka dyshimet e saj për autorët e krimit dhe këto dyshime do t‘i bëjë publike në ditët në vijim, pasi të bëhen të gjitha nderimet për të vdekurin.

Pas kësaj, të afërm të shumtë të fisit Xhindi me tre automjete, një prej të cilave ajo e deputetit, janë nisur në drejtim të spitalit rajonal të Fierit. Rrugës për në spital, makinat që ecnin me shpejtësi janë përballur me postbllokun e parë policor, të cilit nga xhami i është komunikuar për ngjarjen e ndodhur. Rreth orës 21:35, trupi i Fatmir Xhindit është vendosur në sallën e operacionit të repartit të kirurgjisë të spitalit të Fierit, por mjekët kanë konstatuar se ishte shumë vonë dhe deputeti kishte ndërruar jetë. Të afërmit, të cilët në makinë kishin dalluar që trupi i Xhindit ishte ende i ngrohtë, kanë shpresuar në shpëtimin e 49-vjeçarit dhe kur janë përballur me lajmin e kobshëm kanë reaguar duke thyer ç‘të mundnin, xhama dhe dyer të spitalit, duke krijuar një situatë të nderë. Asnjë person që nuk ishte i afërm i deputetit nuk është lejuar dhe nuk ka mundur t‘i afrohej sallës së operacionit. Ndërkohë, në katin e parë të spitalit kanë qëndruar forca të shumta policore, si dhe drejtuesit më të lartë të pushtetit vendor në Fier. Vetëm pak minuta më pas, vëmendja është përqendruar në Roskovec, aty ku ndodhet familja e 49-vjeçarit. Morti është hapur në familjen e të vëllait, pak pas ngjarjes së rëndë dhe marrjes së lajmit të kobshëm nga spitali.

Policia sapo ka mbërritur, ka rrethuar vendin e ekzekutimit si dhe rrugën e shkurtër që të shpinte për në banesën dykatëshe të deputetit Xhindi. Në vendin e ngjarjes, policia ka gjetur 12 gëzhoja arme automatike që më pas ka rezultuar se ishin qitur nga një kallashnikov. Me familjarët që ndodheshin në banesë, policia nuk ka mundur të shkëmbejë shumë fjalë. Pas rrethimit dhe menaxhimit të vendit të ngjarjes, një urdhër i menjëhershëm ka bërë që uniforma të shumta policie të rrethojnë jo vetëm qytezën e vogël, por të ngrihen postblloqe të shumtë edhe në rrugën nacionale Roskovec-Fier dhe Fier-Berat.

Uniforma të shumta janë nisur në drejtim të fshatit Kurjan, ku deputeti kishte qenë para se të kthehej në shtëpi. Zona e Kurjanit që ndodhet rreth 6 kilometra larg Roskovecit ka qenë nën kontroll qysh një orë pas ngjarjes nga policia.

Cilët janë Xhindët


Familja dhe pasuria

e deputetit të vrarë

Fatmiri ishte i dyti, mes shtatë vëllezërve. Të afërmit thonë se babai i tij, Faslliu, e ka pagëzuar me emrin Fatmir, pasi ai qysh në minutat e para të lindjes dukej shumë i qetë. 49-vjeçari, para ‘90, ka punuar për shumë kohë si mësues i lëndëve të historisë dhe gjeografisë dhe më pas drejtor shkolle. Fisi i Xhindëve konsiderohet në zonën e Roskovecit si fisi i djemve, pasi të gjithë ata që mbajnë këtë mbiemër lindin djem. Edhe vetë deputeti kishte tre djem: Andin, Amarildon dhe Albanin. Me bashkëshorten e tij, Xhemilen, ai ka lidhur jetë pas një dashurie shumë të fortë. Andi vijon arsimin e lartë në Tiranë në degën mjekësi, kurse i dyti, Amarildo, vazhdon studimet në Rumani, po për degën e mjekësisë. I vogli, Albani, është në shkollën e mesme të përgjithshme "Bazat e Shkencës", shkollë jopublike në qytetin e Fierit. Të tre djemtë e Fatmirit kanë pasur rezultate të mira në mësime dhe nga bashkëmoshatarët e tyre konsiderohen si persona që nuk krijojnë distancë. Nga gjashtë vëllezërit e deputetit Xhindi, dy janë emigrantë prej shumë vitesh, njëri në Itali, ndërsa tjetri në Greqi. Vëllezërit e tjerë jetojnë në Roskovec dhe Kurjan, në vendlindje. Pronat e vëllezërve Xhindi janë vetëm disa hektarë ullishta në Kurjan, të cilat ata i punojnë së bashku. Në emër të vëllezërve Xhindi në Roskovec është një farmaci, të cilën e drejton njëri prej tyre.

Masat

Korçë

Kapshticë,

"blindohet" kufiri

me Greqinë


Vrasja e deputetit Fatmir Xhindi ka blinduar kufirin me Greqinë, në pikën kufitare të Kapshticës. Burime të policisë kufitare bënë të ditur se 1/3 e personelit dhe strukturave të kësaj policie janë në gjendje gatishmërie dhe kryejnë kontrolle të vazhdueshme pa ndërprerje ndaj të gjitha mjeteve dhe shtetasve që paraqiten në kufi. Të njëjtat burime pohojnë se policia kufitare ka marrë masa edhe përgjatë kufirit të gjelbër për të shmangur një kalim të paligjshëm nga mali të personave të dyshimtë që tentojnë t‘i fshihen drejtësisë. Edhe pse policia nuk ka ende në dorë një emër konkret, gjë që e vështirëson punën e saj, të gjitha strukturat policore janë në gatishmëri.

Kukës


Kontrolle të

forta në kufirin

me Kosovën

Vrasja e deputetit socialist Fatmir Xhindi ka nxitur një mobilizim total edhe të policisë së Qarkut të Kukësit, kryesisht në kontrollet e akseve rrugore kombëtare, si dhe në pikat e kalimit të kufirit me Kosovën. Burime nga drejtoria e policisë së qarkut thanë për gazetën "Shqip" se qysh prej mbrëmjes së të dielës, i gjithë efektivi ka kaluar në gjendje gatishmërie të lartë dhe se në çdo aks rrugor po bëhen kontrolle intensive. Në tre doganat kryesore të vendit që lidhin Shqipërinë me Kosovën, përkatësisht në Qafë Morinë të Tropojës, në Qafë Prush të Hasit si dhe Morinë të Kukësit janë përforcuar kontrollet e kufirit me efektivë shtesë, ku përveç kontrollit nga sistemi TIMS që bëhet për dokumentet, po kontrollohen edhe karroceritë e makinave. Su.Di.

Lot dhe lule në ceremoninë e varrimit


Familjarët, kolegët dhe dashamirësit përcollën me nderime trupin e pajetë të deputetit


Shteti zbret në Roskovec. Vetëm 2 orë pas vrasjes së Fatmir Xhindit, pranë banesës së tij në Roskovec ka mbërritur kreu i opozitës, Edi Rama, ndërkohë që deputetë të tjerë socialistë, si Albert Çaçi, Gramoz Ruci, Ylli Bufi etj., kishin kohë që kishin ardhur. Rama i shoqëruar nga Fidel Ylli, si dhe nga krerë të PS-së lokale, ka hyrë në banesën e të vëllait të deputetit të vrarë. Të qarat bënë që mes Ramës dhe familjarëve, për disa minuta të mos kishte asnjë fjalë përveç përqafimit. Motra e deputetit, Monda, ka humbur ndjenjat gjatë kohës që Rama ishte brenda në shtëpi. Nga një dritare e dhomës ku qëndronte Rama dhe të afërt të shumtë, vinin zërat e përpjekjeve për të sjellë ndërmend motrën e deputetit. Pas qetësimit të situatës, kreu i opozitës jo vetëm që i ka ngushëlluar, por ka kërkuar të dinte nga familjarët gjithçka kishte ndodhur. Ai ka bërë thirrje për të mos shpejtuar me daljen në deklarata dhe akuza. Edi Rama doli nga shtëpia e vëllait të Fatmir Xhindit, ndërsa ora po shkonte rreth mesnatës. Pas tij ishte kryetarja e Parlamentit, Jozefina Topalli, ajo që ka kryer ngushëllimet e saja. Më pas kanë vijuar krerët më të lartë të Policisë së Shtetit, të SHISH-it, si dhe mjaft deputetë të së majtës dhe kryesisht të PS-së.

Mëngjesin e së dielës, në orën 07:00, trupi i pajetë i deputetit Fatmir Xhindi është sjellë nga morgu për në banesë. Vargu i gjatë me makina që shkonte në disa kilometra, ka bërë që rruga Fier-Berat për afro një orë të ishte e bllokuar. Mes ngashërimeve dhe të qarave pa fund, arkë-morti është futur në shtëpi. Në katin e dytë të godinës dykatëshe të deputetit Fatmir Xhindi, me dhjetëra të afërt e familjarë i kanë dhënë atij lamtumirën e fundit. Gjatë gjithë natës së kaluar, të gjithë banorët e Roskovecit dhe të rrethinave të tij ishin në sheshin kryesor të qytetit, si dhe në rrugën që të shpinte për në banesën e Xhindit. Që nga ora 10:00, deri në 12:00 të mesditës, deputetë, politikanë, krerë partish, si dhe mjaft drejtues të lartë të shtetit, kanë kryer homazhe. Nuk ka munguar asnjë prej politikanëve për të bërë ngushëllime në familjen e deputetit. Në orën 12:00 ishte Kryeministri Berisha ai që vizitoi familjen e Xhindit. Kryeministri premtoi zbardhjen e ngjarjes.

Djali i madh i deputetit qëndronte mes dy xhaxhallarëve dhe dajës teksa priste ngushëllimet pa fund. Pas Kryeministrit, ngushëllime kreu edhe Presidenti i Republikës, Bamir Topi. Ai tha se "Fatmiri ishte një nga miqtë e mi personal. Me vdekjen e tij, humbja ime ka qenë e dyfishtë. Do të gjenden autorët, si dhe bashkëpunëtorët", u ka thënë familjarëve Presidenti Topi. Deri në orën 13:00, kur trupi i pajetë i deputetit është sjellë në Kinemanë e Roskovecit, me dhjetëra e dhjetëra politikanë, ministra e drejtues të lartë të shtetit kanë bërë vizitë pranë familjes. Në orën 13:00, ndërsa banda e qytetit po luante pjesë homazhi, arkë-morti që ngrihej kryesisht nga deputetët socialistë, i mbajtur në krah, është nxjerrë nga banesa dhe i është drejtuar vendit ku do të kryheshin homazhet zyrtare në kinemanë e qytetit. Pjesëmarrësit në vargun e gjatë mortor ishin me qindra. Rruga dhe sheshi i qytetit kanë qenë totalisht të bllokuara nga njerëzit e shumtë, të cilët i jepnin lamtumirën e fundit Fatmir Xhindit. Homazhet i kanë hapur deputetët Taulant Balla dhe Erion Braçe. Më pas kanë vijuar përfaqësuesit e Bashkisë së Fierit, për të pasuar me mjaft të tjerë. Fjalët nuk kishin vend në këto çaste të fundit të homazhit. Kryeparlamentarja Topalli kreu homazh ditën e diel. Ndërkohë që pas saj ishte Edi Rama, i cili vendosi një tufë me lule dhe qëndroi për disa minuta pranë arkivolit. Homazhet kanë vijuar kështu deri në orën 14:45, derisa banorë të shumtë të zonës, si dhe të njohur të deputetit, t‘i jepnin atij lamtumirën. Fjalimin e fundit mortor e ka mbajtur kreu i opozitës, Edi Rama. I shoqëruar nga të gjithë deputetët socialistë, me arkivolin përballë, Edi Rama jo vetëm që ka komunikuar për herë të fundit me deputetin, por ka bërë thirrje edhe për gjetjen sa më shpejt të autorëve. Më pas, ceremonia ka vijuar me udhëtimin drejt fshatit të lindjes së Fatmir Xhindit, Kurjan, ku ai ishte një ditë më parë. Në varrezat e fshatit është kryer ceremonia mortore, ku merrnin pjesë qindra persona.