Mazhoranca miraton ngritjen e komisionit hetimor

Parlamenti miraton me 73 vota ngritjen e komisionit hetimor për zgjedhjet e 28 qershorit, ndërsa seanca plenare maratonë ka përfunduar pa u arritur konsensusi me opozitën.
Fundi i seancës u shoqërua me debate dhe zhvillime kaotike e te zakonta në historinë e parlamentarizmit shqiptar.

Deputeti socialist Erjon Brace, nuk saktësoi nëse opozita do të dalë përfundimisht nga kuvendi, por akuzoi kryeministrin dhe kryetaren e kuvendit se kanë shkelur parimet e demokracisë dhe se po vjedhin, po vrasin jo vetëm deputetët por edhe qytetarët e thjeshtë.

"Ne do të përballemi në cdo lloj forme ndaj kësaj dysheje kriminale Berisha-Topalli. Protesta do të marrë formë të re dhe ne prej nesër do jemi në krye të saj", u shpreh Brace, pa sqaruar se cila do të jetë rruga që do të ndjekë opozita.

Edhe deputeti socialist Fatmir Xhafaj është shprehur i habitur përsa ka ndodhur në sallën e kuvendit, pak minuta më parë, ku sipas tij kryetarja e parlamentit ka treguar papërgjegjshmëri totale, duke kryer një veprim të paligjshëm.