Ekspertët nuk firmosin për "aksident" të biznesmenit

Misteret e vdekjes së Kosta Trebickës ndajnë në dy grupe edhe hetuesit e ngjarjes.Shumë dilema vazhdojnë të mbulojnë me mister vdekjen e Kosta Trebickës, edhe pas një versioni zyrtar mbi këtë çështje, që ka ardhur nga ana e policisë, pas ngjarjes dhe që paraprakisht e ka vlerësuar si një aksident me makinë atë që ka ndodhur në zonën e Kuleve të Gjergjevicës. Momenti kur ka ndërruar jetë, koha e gjetjes së viktimës, gjurmët dhe dëshmitë, shenjat e mjetit në rrugë, mungesa e gjurmëve të gjakut në mjet, dëmtimet që ka pësuar ky i fundit, shpendi që nuk është i zonës, arma e gjahut, distanca e trupit nga mjeti, pozicioni i vendosjes së viktimës në rrugë dhe shumë elementë të tjerë, duket se ka ndarë hetuesit në dy grupe të pozicionuara në pista të kundërta. Të gjitha këto dilema kanë bërë që edhe mes specialistëve, që po merren me këtë çështje, të ketë mendime të kundërta. Madje, kjo ka bërë që jo të gjithë personat që morën pjesë në këqyrjen e vendit të bien dakord për të firmosur procesverbalin e mbajtur me këtë rast. Burime konfidenciale nga prokuroria thanë, për gazetën "Shqip", se procesverbali në fjalë mban siglën "Shkelje e rregullave të qarkullimit rrugor. K.Trebicka". Pikërisht ky siglim ka ndezur debatet mes personave që kanë këqyrur vendin e ngjarjes dhe në përfundim, jo të gjithë kanë pranuar të firmosin, edhe pse ky është një detyrim ligjor. Një pjesë e hetuesve të çështjes pranojnë versionin e aksidentit, nisur nga elementët në vendin e ngjarjes, ndërsa të tjerë kanë rezerva për këtë motiv dhe dyshojnë për vrasjen e biznesmenit shqiptaro-amerikan. Një pjesë e atyre që kanë ndjekur nga afër veprimet në vendin e ngjarjes kanë refuzuar të vënë firmën në këtë procesverbal, duke mos qenë të bindur për faktin në rast se vdekja ka ardhur si pasojë e aksidentit. Në pritje të vijimësisë së hetimeve dhe rrjedhës që mund të marrin këto të fundit, duket se një pjesë e përfaqësuesve të grupit hetimor kanë preferuar të mos nënshkruajnë asgjë deri në plotësimin e dosjes me të gjithë elementët. Dyshimet kryesore kanë ardhur për një sërë arsyesh, mes të cilave edhe plagët në trupin e viktimës dhe gjurmët dhe elementët që janë gjetur në vendin e ngjarjes, në afërsi të trupit të shtrirë në rrugë, mes të cilave sendet që ka pasur me vete dhe shpendin, që nuk është i zonës malore. Gjithsesi, ndërsa në Korçë ekspertët autoteknikë amerikanë nuk kanë mbërritur ende, as prokuroria dhe as policia nuk jep më asnjë sqarim mbi këtë çështje, deri në plotësimin e dosjes me këtë ekspertim tepër të rëndësishëm. Në juglindje të vendit duket se ka pllakosur heshtja mbi vdekjen e Trebickës nga ana e zyrtarëve që po ndjekin nga afër këtë proces hetimi dhe veprimet mbi ngjarjen e rëndë. Mjeti i Kosta Trebickës ndodhet i bllokuar, si një nga elementët kryesorë të hetimit në pritje të ardhjes së ekspertëve të huaj, që do të thonë edhe fjalën e fundit, duke i shtuar dosjes prova të tjera të rëndësishme që ndihmojnë hetimet e nisura. Mjeti është bllokuar në ambientet e Drejtorisë së Policisë, ndërsa ekspertët deri më tani kanë parë nga afër dëmtimet, të cilat janë shënuar në një listë bashkë me gjurmët që janë lënë në brendësi të tij, por pa bërë një vlerësim që duhet të ketë patjetër mendimin e ekspertëve autoteknikë. Dosja me provat nga vendi i ngjarjes, sipas të dhënave nga burime të mirinformuara, është transferuar në drejtim të kryeqytetit për llogari të hetimeve të Prokurorisë së Përgjithshme, ndërsa një pjesë e provave janë bllokuar për llogari të palës amerikane dhe faktit se në këtë hetim do të merret një mendim më i specializuar prej tyre. Burimet nuk bëjnë të ditur se cilat janë në fakt provat dhe elementët në dispozicion të organit qendror të hetimit, por ajo që është e sigurt është fakti se kjo çështje ka marrë një shtrirje të gjerë në nivel specialistësh dhe ekspertësh për të dalë në një konkluzion final mbi vërtetësinë e asaj që ka ndodhur me Kosta Trebickën. Nga ana tjetër, dëshmitë e siguruara nga personat që janë marrë në pyetje lidhur me gjetjen e viktimës, ardhjen e tij në fshatin turistik, qëndrimin dhe më pas daljen për gjah, janë mbajtur në Korçë. Për këtë rast po punohet paralelisht me dosjen nga një përfaqësi e madhe në numër specialistësh të policisë, ekspertësh dhe prokurorësh. Por, pa një vlerësim të mjetit duket se kjo çështje do të vazhdojë të mbetet mes dilemave, në rast se ngjarja ka të bëjë me një aksident apo me një vrasje të mundshme të 50-vjeçarit. Dilema këto që kanë përfshirë edhe specialistët që kanë mendime të ndryshme mbi versionin përfundimtar që duhet të jepet për këtë rast.