Miratohet kodi zgjedhor

Wed Nov 19 2008, 16:29

112 deputetë nga 140 që ka Parlamenti në Shqipëri dhanë votën pro kodit të ri zgjedhor. Ashtu si 7 muaj më parë kur u ndryshua në Kushtetutë sistemi zgjedhor , PD dhe PS arritën mbrëmjen e së martës konsensus të plotë. Ndërsa deputetët grevistë të urisë dolën nga salla për t’u bashkuar me përkrahësit e tyre që protestonin pranë selisë së Parlamentit. Kryetari i LSI, Ilir Meta, figura kryesore e grevës, u premtoi përkrahësve se do të vazhdojë me protestat. Përpara se të miratohej kodi zgjedhor, deputetët mbajtën fjalime për rreth 4 orë. Përfaqësues të PD-së deklaruan se mes konfliktualitetit që ka mbizotëruar në skenën politike në Shqipëri dhe konsensusit, partia në pushtet, pa hezitim zgjodhi këtë të fundit.

Ndonëse në një mendje për epërsitë e kodit të ri, deputetë të PS të opozitës u shprehen se nëse qeveria nuk do të plotësonte infrastrukturën e duhur ( kartat e identitetit, listat zgjedhore), zgjedhjet do të rrezikoheshin përsëri.

Për herë të parë në 10 vjet, kodi zgjedhor u përgatit tërësisht nga vetë deputetët, pa asistencën e drejtpërdrejtë të OSBE.

Zgjedhjet e përgjithshme politike duhet të mbahen në qershor të vitit 2009 ose, nëse infrastruktura e zgjedhjeve nuk do të jetë gati, disa muaj më vonë. Pas zgjedhjeve problematike të më shumë se një dekade, objektiv ende i paarritur nga politika në Shqipëri është që zgjedhjet të mos kontestohen prej palës humbëse, rezultati të pritet me qetësi, votat të numërohen në kushte normale dhe humbësi të urojë fitimtarin.

Deputetët ndërpresin grevën

Dhjetë deputetët grevistë dolën nga salla e parlamentit ku zhvilluan grevën e tyre për një javë dhe u bashkuan me protestuesit përkrahës të tyre, në sheshin përpara selisë së Kuvendit. Kryetari i LSI-së, figura qendrore e grevës së urisë, deklaroi se nga dita e mërkurë do të nisë një etapë tjetër e protestës kundër Kodit zgjedhor që po përgatitet për miratim.

Zoti Meta deklaroi se as diplomatët e huaj nuk do të jenë në gjendje të ndalin manipulimin e zgjedhjeve, që sipas tij po përgatisin dy partitë PD dhe PS.

Burimi-BBC