Injorance ligjvenesish qe sbejne detyren e tyre

Deputetët thonë se nuk patën mundësi të lexojnë ligjet e paketës së pavarësisë

Rreth 50 ligje që burojnë nga Paketa e Ahtisarit, të miratuar në Kuvendin e Kosovës, do të mund të kthehen sërish në rishqyrtim parlamentar për harmonizim me Kushtetutën dhe aktet e tjera juridike. Kryetari i Komisionit për Legjislacion në Kuvendin e Kosovës, deputeti Bahri Hyseni, tha dje për radion “Evropa e Lirë”, se Kuvendi do të jetë i gatshëm që në çdo rast të konfliktit ndërmjet këtyre ligjeve me Kushtetutën e Kosovës, t’i rikthejë ato për shqyrtim dhe harmonizim. “Do t’u përshtaten rrethanave aktuale që kemi në Kosovë. Në momentin kur këto ligje bëhen të paimplementueshëm, nuk mund të zbatohen apo shihen pengesa, atëherë natyrisht që institucionet e Kosovës duhet të shikojnë mënyrat sesi të dilet nga situata dhe mund të fillojë edhe çështja e plotësimit dhe e ndryshimit të këtyre ligjeve, që është pak më e komplikuar”, tha deputeti i PDK-së. Edhe Ahmet Isufi nga AAK-ja konsideron se ligjet duhet të harmonizohen me rrethanat ekzistuese. Miratimi i këtyre ligjeve në pako, sipas Isufit, ishte një rast i veçantë në kohën menjëherë pas shpalljes së pavarësisë, për të zbatuar obligimet që kishte marrë Kosova. Por ai shton se këto ligje në vazhdimësi duhet t’u përshtaten rrethanave aktuale, andaj edhe pritet që Kuvendi kohë pas kohe t’i nxjerrë ato në shqyrtim dhe harmonizim me Kushtetutën e Republikës së Kosovës. “Janë ligje të cilët në të ardhmen duhet të shqyrtohen, për arsye se duhet të bazohen në Kushtetutën e Kosovës, por edhe në realitetin e Kosovës, dhe se ne kurrë nuk do të kemi gjendje statike në shoqërinë tonë. Prandaj, shqyrtimi i tyre duhet të bëhet sa më shpejt që të jetë e mundur, në mënyrë që të kemi ligje të bazuar në realitet dhe, po ashtu, të zbatueshëm në praktikë”, u shpreh ai. Deputeti i LDD-së, Adem Salihaj, gjithashtu pajtohet se ligjet që burojnë nga dokumenti i Ahtisarit duhet t’i nënshtrohen rishikimit dhe rishqyrtimit në Kuvend, pasi ata kishin kaluar në Kuvend pa asnjë shqyrtim. “Ju e dini sesi i kemi kaluar ligjet e pakos së Ahtisarit. Të gjithë janë kaluar brenda 24 orësh, pa debat, bile as që i kemi lexuar, sepse mundësitë teknike e praktike nuk kanë qenë as që t’i lexojmë, e lëre më që të bëjmë ndonjë vlerësim apo korrigjim. Mendoj se tani në proces, kur pavarësia është realizuar, mund të konstatojmë se këto ligje, ndoshta për shkak të ngutjes apo ndonjë arsyeje tjetër, nuk kanë mundur të harmonizohen sa duhet me Kushtetutën e Republikës së Kosovës dhe atëherë domosdo lind nevoja që ato të rishikohen”, tha Salihaj. Miratimi i dhjetëra ligjeve që burojnë nga dokumenti i Ahtisarit ishte pjesë e zbatimit të obligimeve që kishte marrë Kosova para bashkësisë ndërkombëtare. Këto ligje rregullojnë segmentet dhe fushat kryesore shtetërore. Miratimi i tyre në Kuvend, pa shqyrtim, ka anashkaluar të gjitha procedurat me të cilat punon Kuvendi, por kjo u bë në pajtueshmëri të plotë nga i gjithë spektri politik i Kosovës, me qëllim përfundimin e të gjitha procedurave përpara shpalljes së pavarësisë së Kosovës. Në hartimin e këtyre ligjeve morën pjesë jo vetëm autoritetet kosovare, por edhe ato ndërkombëtare. Si pasojë, ndryshimi eventual i tyre kërkon përfshirjen dhe miratimin e të gjithë faktorëve që i kanë hartuar këto ligje.