Afera, si ruajti qeveria Fierzën për t'ia shitur energjinë Damir Fazlliç

Fakte të reja dalin në drite ne lidhje me mbushjen me ujë të hidrocentralit të Fierzës me qëllim shitjen e energjisë. Gjatë gjithë muajit nëntor e deri më datë 30 dhjetor, sasia e energjisë së prodhuar nga turbinat e Fierzës nuk i kalon të 6000 MW/h në ditë ndërkohë që kapaciteti maksimal i këtij HEC-i është edhe njëherë sa kaq.

Ajo që bie më shumë në sy ka të bëjë me ecurinë e energjisë së prodhuar gjatë fillimit të muajit nëntor. Më datë 6 nëntor Fierza ul ndjeshëm prodhimin nga 2600 MW/h që ishte një ditë më parë në vetëm 300 MË/h në një moment ku nuk ka të dhëna për avari apo remont në agregatet prodhues. Ky ritëm prodhimi ndiqet edhe në ditët në vazhdim. Më datë 7 nëntor Fierza ka prodhur po 300 MW/h energji në ditë, ndërsa kulmi arrin më datë 8 nëntor ku nga ky HEC nuk është prodhuar asnjë kilovat energji elektrike.

Sipas të dhënave që "Shekulli" ka në dorë, gjatë këtyre ditëve ku prodhimi është në minimumin e tij, nuk raportohet asnjë defekt që mund të ketë shkaktuar probleme. Për shkak se nuk është nxjerrë asnjë metër kub ujë nga turbinat, më datë 8 nëntor kuota e Fierzës u rrit me 1.1 metra duke arritur në 284.57 metra. Më datë 9 nëntor Fierza rifillon prodhimin e energjisë por me një kapacitet vetëm 200 MW/h.

Më datë 11 nëntor, Fierza do të rriste ndjeshëm prodhimin e energjisë krahasuar me ditët e mëparshme duke arritur në 3200 MW/h në ditë. Kjo rritje prodhimit ndodh pikërisht në ditën kur në tregun vendas hyn kompania serbe e energjisë RUDNAP, ku është aksioner Damir Fazlliç, miku i familjes së Kryeministrit Berisha, fakt ky i pranuar publikisht dhe nga ai vetë gjatë një seancë parlamentare. Kompania në fjalë ka blerë energji nga KESH-i deri në fund të muajin nëntor me një kapacitet 2400 MW/h në ditë.

Gjatë gjithë kësaj periudhe kompania serbe RUDNAP ka qënë blerësi më i madh i energjisë shqiptare.
Megjithëse sasia e ujit në hidrocentralet e vendosura mbi lumin Drin kishte arritur nivele të kënaqshme, madje duke kaluar edhe kuotat e sigurisë, çuditërisht vërehet ulje e sasisë së energjisë së prodhuar në vend. Nga dita në ditë sasia e energjisë së prodhuar nga HEC-et e Drinit vjen në ulje ndërkohë që ky boshllëk fillon të mbushet nga rritja e importit. Kështu, më datë 26 nëntor prodhimi total i energjisë nga HEC-et e vendit ishte 16.334 MW/h në ditë.

Më datë 27 nëntor sasia e energjisë së prodhuar zbret në 15472 MW/h, ndërsa një ditë më pas kjo shifër ulet edhe më tej duke arritur në 14937 MW/h ndërkohë që nevojat e vendit për energji vazhdojnë të rriten. Kjo gjendje do të vazhdojë deri në javën e dytë të muajit dhjetor ku vërehet një rritje e lehtë e sasisë së energjisë së prodhuar nga HEC-et vendase.

Për t'u theksuar është fakti se megjithëse prodhimi i energjisë në vend gjatë gjysmës së dytë të nëntorit varionte mesatarisht në 16.000 MW/h në ditë, më datë 1 dhjetor ajo pësoi një ulje të fortë duke arritur në 10.676 MW/h në ditë. Kjo datë përkon edhe me ditën kur kompania RUDNAP nuk rezulton më të ketë blerë energji nga Shqipëria.
Duket se agregatet e HEC-it të Fierzës janë vënë në punë vetëm për të plotësuar nevojat e RUDNAP-it për energji dhe me përfundimin e marrëveshjes ato kanë vazhduar në "regjimin" disa javor të prodhimit të ulët në pritje të klientit të radhës megjithëse niveli i ujit kishte kaluar edhe kuotat e sigurisë. Më datë 1 dhjetor uji në Fierzë ishte në nivelin 285.3 metrave duke vijuar rritjen në ditët në vazhdim.


Ja si u ruajt uji në Fierzë
TIRANË- Nëse turbinat e HEC-it të Fierzës do të kishin punuar me kapacitet normal gjatë muajve nëntor-dhjetor, sot nuk do të flitej për përmbytje në Shkodër. Sipas të dhënave zyrtare, niveli i prurjeve në këtë hidrocentral për këtë periudhë ka qenë më se i menaxhueshëm. Por uji duhej ruajtur për të rritur sa më shumë përfitimet nga shitja e energjisë. Duke mbajtur Fierzën të mbyllur, vetëm brenda një muaji qeveria rriti rezervën energjetike nga 979.4 GËh në 1353.9 GËh.

Të dhënat tregojnë se nga data një deri në mes të muajit dhjetor, niveli i prurjeve në liqenin e Fierzës ka variuar nga 63 m³/s më datë tetë në 234 m³/s më datë 10. Ndërsa pas datës 17 dhjetor deri në 23 dhjetor prurjet kanë qenë në nivelin mesatar të 250 m³/s. Kulmi ka arritur me 1055 m³/s më 28 Dhjetor dhe më pas niveli i prurjeve është ulur sërish.

Nëse krahasohen niveli i prurjeve me kuotën e liqenit vërehet se puna e agregateve për prodhimin e energjisë në këtë HEC nuk ka vijuar normalisht. Nëse punojnë me kapacitet të plotë, të katër turbinat e e Fierzës derdhin më shumë se 450 m³/s. Më datë 1 prurjet në liqen kanë qenë 131 m³/s dhe kuota 285.3 metër. Ndërsa më datë 5 prurjet kanë rënë në 128 m³/s kurse kuota e liqenit ka vijuar të rritet në 285.45 metra.

Nëse turbinat e Fierzës do të ishin vënë në punë, me këtë nivel prurjesh duhet të kishte një ulje të kuotës të paktën me disa centimetra. Por turbinat kanë qëndruar të fikura për të kursyer ujin dhe për pasojë është rritur niveli i liqenit duke bërë të detyrueshme hapjen e portave më datë 2 janar, e cila shkaktoi edhe përmbytjet masive në Shkodër.
Vetem tre dite me pare, qeveria shqiptare ka rinisur shitjen e energjisë ndaj kompanisë serbe ku është aksioner Damir Fazlliç. Dokumentet zyrtare tregojnë se më datë 13 janar, shteti shqiptar i ka shitur kompanisë së Fazlliç 1200 megavat energji elektrike për orë.

Deri më 13 janar ne vetëm kemi marrë energji nga kompania "RUDNAP-GSA". Mesatarisht janë transferuar nga 192 megavat për orë. Ndërkohë dje ka reaguar edhe djali i kryeministrit Sali Berisha, Shkëlzeni, i cili ka deklaruar se nuk është takuar me Damir Fazlliç për të diskutuar në lidhje me shitjen e energjisë elektrike, duke shtuar që kamerat e sigurisë le të publikojnë darkën e tij me Fazlliç në restorantin në fjalë.


Darka sekrete e Damir Fazlliç me Shkëlzen Berishën
Roli i qeverisë si shkaktare e përmbytjeve në Veri të vendit rëndohet edhe më shumë nga zbulimi i një takimi sekret të mbajtur në një prej restoranteve luksoze të kryeqytetit.

Protagonistë të këtij takimi ishin djali i kryeministrit Berisha, Shkëlzeni, Damir Fazlliç, "miku i familjes" dhe një nga importuesit e energjisë elektrike në vend, si dhe një nga ministrat e kabinetit.

Çdo ditë Shqipëria blen energji elektrike nga kompania "Rudnap" ku është aksioner Fazlliç si dhe kryen veprime shit-blerje me dy kompani të tjera serbe pas të cilave mendohet se qëndron sërish Fazlliç.

Takimi në fjalë është zhvilluar më datën katër janar, vetëm dy ditë pasi ishin hapur portat e hidrocentralit të Fierzës dhe kishte nisur derdhja masive e ujit. Serbo-boshnjaku i njohur per lidhjet e deklaruara miqesore me familjen Berisha, perfaqesues dhe ndermjtes i interesave financiare et disa kompanive serbe ne Tirane, eshtë shoqëruar nga djali i kryeministrit Berisha, Shkëlzeni.

Të dy janë ngjitur në katin e 24-rt të pallatit në fjalë, qe ndodhet prane redaksise se Shekullit ne zemer te ish-Bllokut. Pak minuta pas tyre ka mbërritur edhe një nga ministrat e qeverisë Berisha 2.
Fazlliç ka qenë shumë aktiv muajt e fundit në vendin tonë. Që në tetor të vitit të kaluar, atëherë kur situata hidrike nisi të kthehej në një temë të nxehtë për shkak të rezervës së konsiderueshme të energjisë që kishte krijuar Shqipëria nga fryrja e kaskadës së Drinit. Gjatë të gjithë kësaj kohe ai ka qëndruar në hotel Sheraton në Tiranë. Kjo është konfirmuar edhe nga regjistrat e hotelit në fjalë.

Ndërkohë në postën kufitare të Rinasit janë shënuar të gjitha hyrje-daljet e biznesmenit serbo boshnjak në vendin tonë. Vizitat e tij në Shqipëri janë shpeshtuar sidomos gjatë muajit dhjetor dhe gjithmonë është parë nën shoqërinë e Shkëlzenit.
Fazllic është favorizuar hapur në të gjitha rastet duke blerë prona me çmim të lirë e më pas duke i shitur ato me çmime shumë më të shtrenjta. Në të gjitha rastet firma që bën konsulencën juridike si dhe përgatit referencat që pranohen nga qeveria është e vajzës së kryeministrit Sali Berisha, Argita Malltezit.

Aferat e Fazlliç me energjinë elektrike janë denoncuar që në vitin 2008 nga ish-drejtori i KESH-it Andis Harasani. "Miqtë e mikut qeveritar Fazlliç, kompania serbe Rudnap në 2006, shiti energji në Shqipëri me 30 deri në 35 për qind më shtrenjtë. Arriti të shesë energji, kur ndryshe nga sa thotë ligji i prokurimeve publike, nuk kishte asnjë eksperiencë të mëparshme në Shqipëri. A thua se konsulenca dhe referencat e shkëlqyera legale të firmosura në zyrën e Argitës, vlenin më shumë se ajo që kërkon ligji",- ka thënë Harasani.
Ne nje interviste televizive ne kanalin proqeveritar TV Klan, ai ka deklaruar s eka bere nje pasuri prej rreth 50 milione euro gjate kohes se shkurter te aktivitetit en Shqiperi.

Shit-blerja e energjisë elektrike nga kompania e Fazlliç apo kompanitë e tjerë të mbështetura prej tij është objekt hetimi i prokurorisë shqiptare.