LDK tërhiqet nga Qeveria, tani zgjedhje të jashtëzakonshme

Lidhja Demokratike e Kosovës (LDK) ka vendosur të largohet nga Qeveria. Vendimi është marrë në mbledhjen e Kryesisë së LDK’së, e cila është mbajtur në mesditë.
"Ka qenë vendim unanim i Kryesisë së LDK’së. Duke analizuar zhvillimet e fundit dhe duke dashur që të hap proceset normale të zhvillimit të demokracisë", ka thënë kryetari i LDK-së, Fatmir Sejdiu.
"Absolutisht LDK asnjëherë nuk ka qenë pengesë dhe do të jetë kontribuuese në të gjitha proceset e rëndësishme për shtetin", tha Sejdiu për gazetarët, pas përfundimit të mbledhjes.
Partneri kryesor në koalicion, Partia Demokratike e Kosovë, ka paralajmëruar konferencë për gazetarë në orën 15.


Haraqija konfirmoi i pari prishjen e koalicionit
Express ka raportuar për prishjen e koalicionit, derisa mbledhja e Kryesisë po vazhdonte ende.
"Po. Kemi vendosur të tërhiqemi nga koalicioni me PDK'në. Vendimi është marrë me shumicë votash", i tha Expressit, Astrit Haraqija, anëtar i Kryesisë së LDK-së.
Shumica e anëtarëve të Kryesisë kanë përkrahur daljen e LDK-së nga Qeveria, ka treguar një burim nga mbledhja.
Mbledhja e Kryesisë ka filluar në orën 12 dhe rreth orës 13:30 po vazhdonte ende.

Komunikata e LDK-së
Kryesia e LDK-së, në mbledhjen e mbajtur më 16.10.2010, duke analizuar thellë zhvillimet e fundit në Kosovë, merr këtë:

Vendim
1. Nga dita e hënë, 18 tetor 2010, LDK tërhiqet nga Koalicioni qeverisës, përkatësisht nga Qeveria e Republikës së Kosovës.
2. Të gjithë përfaqësuesit e LDK-së: Zv/Kryeministri, ministrat dhe zv/ministrat, përfundimisht në ditën e hënë - 18.10.2010, bëjnë dorëzimin e detyrave nga postet që kanë pasur.
3. LDK mbetet e përkushtuar të jetë kontribuese e fuqishme në të gjitha proceset e rëndësishme demokratike e shtetërore në interes të vendit dhe gjithë qytetarëve të tij.
Vendimi është nënshkruar nga kryetari i LDK-së, Fatmir Sejdiu.



Kuçi: Tani zgjedhje të jashtëzakonshme
Nënkryetari i Partisë Demokratike të Kosovës, njëherësh zëvendëskryeministër i Kosovës, Hajredin Kuçi, tha se Lidhja Demokratike e Kosovës e futi Kosovën në krizë, me vendimin e saj për të dalë nga koalicioni qeverisës.
Në një prononcim për Radion Evropa e Lirë, Kuçi tha se tani duhet të gjenden zgjidhje emergjente dhe të jashtëzakonshme.
“Momentalisht vendi është vënë në krizë institucionale. Nuk ka nevojë që të shkojë më tutje. Tani duhet të dalë nga kjo krizë dhe zgjedhjet e jashtëzakonshme mund të jenë dalje nga kriza sa më shpejtë që të jetë e mundur”, tha Kuçi.

Thaçi s’e komenton ende vendimin
Kryeministri Hashim Thaçi, deri më tani nuk e ka komentuar vendimin e LDK-së për tërheqje nga koalicioni qeveritar.
“Nuk kam informacione zyrtare për vendimin e LDK’së”, ka deklaruar Kryeministri Thaçi, kur është pyetur nga gazetarët për largimin e LDK’së nga Qeveria.
Këto komente, Thaçi i bërë gjatë një vizite në Ferizaj.