Shqipëria e quan Maqedoninë FYROM

Shqipëria ka bërë një kthesë të fuqishme diplomatike në marrëdhëniet me Maqedoninë. Pas një periudhe disavjeçare, Tirana zyrtare ka vendosur ta riquajë vendin fqinj FYROM, siç e quan edhe Organizata e Kombeve të Bashkuara.
Pa asnjë shpjegim, ky veprim ka ardhur në deklaratën për shtyp, të shpërndarë nga Departamenti i Informacionit i Këshillit të Ministrave, për takimin mes Kryeministrit Sali Berisha dhe zv/kryeministrit të Maqedonisë, Abdilaqim Ademi.

Takimi mes Berishës dhe Ademit u karakterizua nga një frymë e ngrohtë bashkëpunimi mes dy vendeve, ku u diskutua edhe për 100-vjetorin e Kongresit të Manastirit, por etiketimi i Maqedonisë nga ana e Shqipërisë me emrin FYROM duket se lidhet direkt me Shkupin.

Më 19 shkurt të 2008-ës, në takimin mes Kryeministrit Berisha dhe homologut të tij, Nikolla Gruevski, për çështjen e liberalizimit të vizave me Shqipërinë, njoftimi për shtyp i Këshillit të Ministrave e cilësoi Gruevskin si Kryeministër të Republikës së Maqedonisë dhe jo si Kryeministër të ish-Republikës Jugosllave të Maqedonisë (FYROM).

Në njoftimin për shtyp të shtatë muajve më parë, citohej se “Kryeministri i Republikës së Maqedonisë, Nikolla Gruevski, ndodhet në Tiranë dhe do të takohet me homologun e tij, Sali Berisha, ku edhe do të firmosin marrëveshjen e re për regjimin kufitar mes dy vendeve”.

Ndryshimi i qëndrimit për mënyrën e drejtimit të emrit të Maqedonisë ka ardhur befasisht pas përfundimit të një takimi të djeshëm mes Berishës dhe numrit dy të qeverisë maqedonase.

Maqedoninë me emrin FYROM e njohin edhe organizmat ndërkombëtare, si Bashkimi Evropian dhe NATO, ku Shqipëria pret të anëtarësohet. Dihet që detajet janë të rëndësishme në fushën e diplomacisë dhe vlen të theksohet se Shqipëria, pas disa vjetësh e konsideron sërish shtetin fqinj me emrin FYROM.

Ndryshimi i qëndrimit të qeverisë shqiptare lidhet me kërkesën e kahershme për anëtarësimin e plotë të Shqipërisë në NATO dhe BE. Misteri i këtij qëndrimi të qeverisë “Berisha” lidhet edhe me faktin se vendi ynë pret ratifikimin e protokollit të NATO-s nga Greqia, e cila është kundërshtare e fortë e Maqedonisë për emrin e saj.

FYROM

Emri FYROM është “molla e sherrit” mes dy vendeve fqinje, Greqisë dhe Maqedonisë. Athina nuk do të lëshojë pe në insistimin e saj se fjala Maqedoni është 100 për qind fjalë greke.

Përmes një përkushtimi të madh, qeveria greke i ka detyruar shumë institucione ndërkombëtare që të mos e pranojnë këtë emër. Këto organizata përfshijnë edhe OKB-në dhe BE-në. Në NATO, vetëm Turqia, rivali historik i Greqisë, e ka njohur Republikën Maqedonase me këtë emër.

Athina e kundërshton ekzistencën e shtetit fqinj të quajtur Maqedoni, pasi beson se mund të komprometohet tradita e maqedonasve klasikë si Aleksandri i Madh. Rajoni verior i saj gjithashtu quhet Maqedoni.

Prandaj, dy Maqedonitë nuk ndajnë vetëm kufirin, por edhe emrin, dhe për shumë grekë kjo situatë është e patolerueshme.