Legalizimet, gati 6 mijë leje në nëntor

ALUIZN-i dorëzon dosjet. Dokumentet do të shpërndahen çdo javë.Kanë përfunduar dhe janë dorëzuar dosjet për 6 mijë ndërtime të paligjshme, që premtohet se do të legalizohen duke nisur nga fundi i muajit nëntor. Drejtuesit e Agjencisë së Legalizimeve, Urbanizimit dhe Integrimit të Zonave Informale kanë garantuar se ky proces i "bërjes me letra" të këtyre pronave do të fillojë në fund të këtij muaji dhe do të bëhet i përditshëm deri në finalizimin e tij. Qëllimi, sipas tyre, është që legalizimi i këtyre pasurive jashtë skemës të mbyllet brenda qershorit 2009, pra përpara datës së zgjedhjeve elektorale të radhës, që do të përcaktojnë edhe partinë politike, që do të jetë në pushtet, deri më 2013-ën.

Premtimi

Nëndrejtori i Përgjithshëm i ALUIZNI-t, Ferdinand Shehu, deklaroi dje se "kemi 6 mijë pasuri, që i kemi kaluar për kalim pronësie, ndërsa çdo javë do të ketë dosje dhe përgatitje të vendimeve të Këshillit të Ministrave për kalim pronësie", duke shtuar se "tashmë i gjithë sistemi i punimit të të dhënave, i azhornimit në terren, i përgatitjes së dosjes, ka hyrë në ciklin e vet të punës". Numri dy i Agjencisë së Legalizimeve ka bërë të ditur edhe kohën se kur do të fillojë ky proces, i cili mban pezull frymën e më shumë se 350 mijë familjeve shqiptare.

Kështu, Shehu theksoi se "lejet e para të legalizimit priten nga fundi i muajit nëntor dhe më pas çdo ditë do të ketë dhënie të lejes së legalizimit në të gjithë territorin e Shqipërisë". Ai ka sqaruar më tej se dhënia e lejeve të legalizimit, do të pasohet me kartelën e pronësisë për regjistrim në zyrën e pasurive të paluajtshme. Një gjë e tillë nënkupton edhe njohjen ligjore të pronës pa leje, qoftë kjo banesë e plotë apo shtesë shtëpie a pallati.

Dosjet

Nëndrejtori i ALUIZNI-t, Shehu, u shpreh se dosjet janë marrë nga njësitë e qeverisjes vendore në mesin e muajit shtator dhe mbi bazën e ligjit të ri të amenduar, pas procesit të klasifikimit të ndërtimeve, filloi ai i azhornimit në terren të tyre. Shehu theksoi më tej se tashmë janë azhornuar më shumë se 60 mijë pasuri në të gjithë territorin.
"Mes tyre, tha Shehu, rreth 30 mijë pasuri janë të prekura, e thënë ndryshe të dixhitalizuara, ndërsa janë përgatitur vendimet e Këshillit të Ministrave për kalimin e pronësisë dhe kompensimit të pronarëve të ligjshëm, pasi tashmë jemi të vendosur se nuk do të ketë legalizim, pa pasur një kompensim të pronarëve të ligjshëm me rregullat e tregut, që do të thotë me çmime të përcaktuara nga harta e vlerës së tokës nga Agjencia e Kthimit dhe Kompensimit të Pronës".
Shtrirja

Sipas Shehut, ka tre natyra legalizimi. Ato janë ndërtimet në masë në zonat periferike; ndërtimet e pallateve me shtesa para vitit 1993; si dhe ndërtimet e veçuara në zonat urbane dhe shtesat e pallateve shumëkatëshe, të cilat kanë deformuar projektet e tyre dhe sot janë jashtë tregu, për shkak të mos marrjes së lejes së shfrytëzimit. Këto banesa nuk janë bërë pjesë e hipotekës dhe nuk gjenden sot në treg, megjithëse qytetarët kanë paguar detyrimet e tyre. Zyrtari i lartë i ALUIZNI-t ka nënvizuar faktin se, duke pasur tre kategori të shpërndara në të gjithë territorin e Shqipërisë, edhe puna e institucionit që përfaqëson është shtrirë si në drejtim të tre kategorive të ndërtimeve edhe në të gjithë territorin e Shqipërisë. "Kjo, në mënyrë që të mos kemi një zonë të parë që do pajiset me leje ndërtimi, siç mund të jetë Tirana apo Durrësi, por procesi të mund të shtrihet në të gjithë qarqet e vendit", ka pohuar Shehu.
Sipas tij, tashmë ekziston një paketë ligjore më e plotë dhe një paketë financiare shumë e kompletuar, ku janë përcaktuar me saktësi dhe korrektësi gjithçka.



Zgjedhjet

Shehu: Procesi i legalizimit brenda mandatit qeverisës

Legalizimi i banesave pa leje do të bëhet brenda këtij mandati qeverisës, që do të thotë brenda muajit qershor të vitit 2009.
Nëndrejtori i Përgjithshëm i Agjencisë së Legalizimeve Urbanizimit dhe Integrimit të Zonave Informale, Ferdinand Shehu, u shpreh, se azhornimi i të gjitha ndërtimeve pa leje do të përfundojë brenda këtij mandati qeverisës. "Ky proces pritet të përfundojë, sipas premtimeve të dhëna të kësaj qeverie, çka do të thotë se do të mbarojë brenda mandatit të qeverisjes", deklaroi Shehu. Sipas tij, procesi i legalizimet do të ketë një nga impaktet më të mëdha në zhvillimin e ekonomisë së vendit. "Janë rreth 150 mijë prona dhe nëse llogarisim secilën me vlerën aktuale të tregut prej afro 50-60 mijë euro secila, do të kenë impakt në ekonomi", tha Shehu. Këto ndërtesa, duke u bërë pjesë e tregut, shpjegoi Shehu, përveç përfitimit të tyre si pronarë të banesave do të sjellin edhe impakt në ekonomi, pasi do t‘i bashkohen armatës së pronave të tjera, të cilat kryejnë veprimet fiskale, tatimore, të pasurisë.