Kapet 1 ton droge identifikohet njeri prej trafikanteve

Mbi një ton kanabis sativa janë sekuestruar në orët e mbrëmjes së të shtunës, gjatë një operacioni të përbashkët mes policisë shqiptare dhe Guardia di Financia italiane.

Sasia e madhe e lendes narkotike, më e madhja e sekuestuar gjatë kohëve të fundit, është bllokuar në vendin e quajtur Bregu i Kasolles në afërsi të Gjirit të Kakomesë. Sekuestrimi, është bërë në sajë të bashkëpunimit të policisë së Sarandës dhe të Vlorës me Guardia di Financia italiane.

Sipas policisë droga ishte prodhuar në Lazarat dhe e transportuar me furgon do të mbërrinte në vendin e quajtur Bregu i Kasolles në afërsi të Gjirit të Kakomesë. Me pas një skaf i nisur nga brigjet italiane drejt ujrave shqiptarë do të bënte transportimin e kanabisit drejt Italisë.

Operacioni antidrogë ka nisur njëkohësisht në të dy shtetet. Guardia di Financa Italiane, sipas policisë së shtetit, në orët e mbrëmjes është vënë në ndjeke të skafit që do të transportonte sasinë e kanabisit drejt Italisë. Ndërsa policia shqiptare ka nisur operacionin për bllokimin e mallit.

Disa nga detajet e operacionit antidrogë, i cili vazhdon ende janë arritur të zbardhen sot paradite.

NEWS24 ka mësuar se sasia e sekuestruar e lëndës narkotike është 1 ton e 134 kg kanabis.

Gjithashtu NEWS24 ka mësuar dhe emrin e njërit prej 3 personave të shpallur në kërkim nga policia të dyshuar si të përfshirë në këtë trafik.

Ai është Avni Seferi, 21 vjec. Sipas të dhënave të policisë, i riu është pronari dhe drejtuesi i mjetit tip furgon me targa VL 6394 B i cili transportonte lëndën narkotike. Në mbrëmjen e së shtunës 21 vjecari kishte braktisur furgonin kur kishte pikasur se po ndiqej nga policia. Nga informacionet e mbrëmshme dy nga të dyshuarit ishin nga Saranda ndërsa personi i tretë ishte nga fshati Lazarat, i Gjirokastrës, nga ku policia dyshon se ka ardhur kanabisi.
(s.g/balkanWeb)