Torres-Vija, Spanja nuk ndalet

Helenët bien nga Olimpi, Rusia i nxjerr jashtë turneut .Spanja ka filluar të mendojë që tani për çerekfinalet e EURO 2008, pasi ka mundur ekipin më të rrezikshëm në grupin e saj, Suedinë. Djemtë e Aragones kanë triumfuar falë lojës së dyshes së sulmit, Fernando Torres dhe David Vija, të cilët kanë shkëlqyer përsëri duke shënuar golat e fitores 2-1, ndonëse i është dashur të presin deri në minutat e fundit të ndeshjes. Ka qenë Vija i cili me golin e tij në minutën e 92-të ka vulosur rezultatin, duke u ngjitur përsëri i vetëm në kreun e renditjes së golashënuesve më të mirë të EURO 2008 me 4 gola.

Spanjollët e kanë nisur takimin në sulm, duke kërkuar menjëherë të gjejnë rrugën e rrjetës. Në rastin e parë të rrezikshëm në minutën e 15-të, ata arrijnë të gjejnë avantazhin me anë të Torres, i cili devijon në mënyrë spektakolare pasimin perfekt të David Silvës. Duket se spanjollët do ta kenë të lehtë, por suedezët kundërpërgjigjen duke rrezikuar me Elmander, i cili krijon panik para portës së Kazijas me një gjuajtje që përfundon në rrjetën e jashtme. Më pas është Larson që ka një mundësi të mirë për vendosur baraspeshën në shifra, por sulmuesi veteran i Suedisë e dërgon topin mbi traversë. Aragones detyrohet të bëjë një zëvendësim, pasi Pujol dëmtohet dhe i lë vendin Albiol. Suedia përfiton nga një gjë e tillë, duke rrezikuar edhe dy herë të tjera me anë të Elmander dhe Ibrahimoviç, gjuajtjet e të cilëve përfundojnë jashtë kuadratit. Megjithatë, insistimi i suedezëve rezulton i frytshëm, pasi në minutën e 34-t vjen edhe goli i barazimit me Ibrahimoviç i cili i shmanget mbulimit të Serxho Ramos dhe e dërgon topin pas krahëve të Kazijas. Spanjollët rikthehen në sulm për të kërkuar edhe një herë avantazhin, por suedezët mbyllen në mbrojtje, duke mos i lënë shumë hapësira kundërshtarëve.

Në pjesën e dytë, Lagerbak vendos të ulë në stol Ibrahimoviç për ta ruajtur për takimin e fundit në grup dhe forca sulmuese e Suedisë bie ndjeshëm. Janë disa raste radhazi për skuadrën spanjolle, por Torres, Vija dhe Silva kontrollohen mjaft mirë nga prapavija e skuadrës nordike që vendos të përdorë kundërsulmin. Aragones vendos të ndryshojë diçka, duke larguar Iniestën dhe Ksavin, për t‘i dhënë hapësirë Fabregasit dhe Santi Kazorlës. Megjithatë, ndryshimet e bëra nuk ndryshojnë shumë në lojën e Spanjës, e cila e ka të vështirë t‘i afrohet portës së Isakson, i cili kontrollon pa vështirësi gjuajtjet nga distanca të spanjollëve. Dukej se kjo ndeshje do të mbyllej me barazimin 1-1, duke lënë të hapur gjithçka për sfidat e fundit të Grupit D. Por David Vija tregon edhe një herë se është në formë të shkëlqyer duke shënuar pikërisht atëherë kur gjithçka dukej e mbaruar, në minutën e 92-të, pas një aksioni ku shfaqet i vetëm para Isakson dhe e dërgon topin qetësisht në shtyllën e dytë, duke vulosur fitoren e skuadrës së tij. Tashmë spanjollët presin të qetë takimin me Greqinë, ku Aragones mund të aktivizojë zëvendësuesit, për t‘i dhënë një pushim të merituar titullarëve para çerekfinaleve.

Grekët eliminohen pas dy ndeshjeve, Rusi-Suedin për kualifikimin


Greqia bie nga Olimpi. Një rënie e rrufeshme, që i kthen me këmbë në tokë pas triumfit të përpara katër viteve. Kampionët në fuqi mposhten 1-0 nga Rusia dhe eliminohen nga turneu vetëm pas dy ndeshjeve. Rusia e ka mposhtur Greqinë në fazën e grupeve edhe në Euro 2004, por në atë rast helenët kanë arritur deri në fund të aktivitetit, duke u shpallur kampionë në mënyrë surprizë.

Ndryshe nga ndeshja e së shtunës, e humbur 2-0 me Suedinë, trajneri Oto Rehagel ka ndryshuar taktikën e lojës, duke kaluar nga mbrojtja me pesë lojtarë në formacionin 4-3-3, duke aktivizuar në sulm Liberopulos dhe Amanatidis përkrah Haristeas. Edhe Hidink ka bërë dy ndryshime në formacionin titullar të sfidës së parë, duke hedhur në lojë mbrojtësin Ignasheviç dhe mesfushorin Torbinski. Në formacionin titullar 4-5-1 ka qenë edhe sulmuesi Pavlyçenko, i rikuperuar nga dëmtimi muskulor. Ndeshja fillon me rritëm të shpejtë, por rasti i parë i rrezikshëm regjistrohet në të 11-n me Biljaletdinov, por gjuajtja nuk e shqetëson Nikopolidis. Pas tij, tentojnë edhe Pavlyçenko e Zhirkov, që nuk gjejnë rrjetën. Grekët provojnë me Haristeas dhe Patsatzoglu, që shpërdorojnë përpara portës. Goli që zhbllokon takimin vjen në të 33-tën dhe mban firmën e Zirjanov, i cili devijon në rrjetë një pasim akrobatik të Semak, që përfiton pas një gabimi trashanik të portierit grek, Nikopolidis. Pjesa e parë mbyllet me tre raste të mira për rusët, që me Pavlyçenkon dhe Biljaletdinov nuk arrijnë të dyfishojnë. Pas pushimit 15-minutësh janë helenët ata që hyjnë më të karikuar në lojë, duke tentuar të barazojnë shifrat, megjithatë Haristeas, Karagunis, Liberopulos e Basinas janë të pasaktë. Edhe të besuarit e Hidink nuk mbeten mbrapa dhe me kundërsulme të shpejta kapin të papërgatitur mbrojtjen kundërshtare, por finalizimi në portë ishte handikapi kryesor: Pavlyçenko ka shansin më të mirë, duke u shfaqur i vetëm me portierin, gjithsesi e djathta e tij nuk është e kalibruar si duhet. Pas tij tenton edhe Biljaletdinov, që në dy momente është i pafat. Kjo sfidë përfundon me fitoren minimale të rusëve, që tashmë do të luajnë kualifikimin në takimin e fundit me Suedinë.


GRUPI D


Suedi-Spanjë 1-2

Greqi-Rusi 0-1


Spanjë 6 2 2 0 0 6-2

Suedi 3 2 1 0 1 3-2

Rusi 3 2 1 0 1 2-4

Greqi 0 2 0 0 2 0-3


NDESHJET

10 qershor

Spanjë-Rusi 4-1

Greqi-Suedi 0-2

14 qershor

Suedi-Spanjë 1-2

Greqi-Rusi 0-1

18 qershor

Greqi-Spanjë 20:45

Rusi-Suedi 20:45



GRUPI D


Suedi-Spanjë 1-2

Greqi-Rusi 0-1


Spanjë 6 2 2 0 0 6-2

Suedi 3 2 1 0 1 3-2

Rusi 3 2 1 0 1 2-4

Greqi 0 2 0 0 2 0-3


NDESHJET

10 qershor

Spanjë-Rusi 4-1

Greqi-Suedi 0-2

14 qershor

Suedi-Spanjë 1-2

Greqi-Rusi 0-1

18 qershor

Greqi-Spanjë 20:45

Rusi-Suedi 20:45